今日下晝 4 點幾，準備搭船入離島 ( 中環去離島的碼頭 )。見距離上船重有幾個字，又帶左相機喺身，咁啱又遠一遠見到有個位可以望到成個會展無野遮，諗住埋去影下。

行行下，見有差人騎鐵馬喺我行緊嘅行人路駛過 ( 唔係好快 )，而且開住燈的，佢行嘅方向同我目標差唔多，咁我又無理佢啦，行到去個位，睇到一堆人圍住個小碼頭度，有艘細水警輪停咗喺度，指住岸邊有舊浮浮下嘅嘢。

由於太多人，我又只係想拿拿聲影完就走去搭船，影左一張之後，醒起唔係好對路，點解會成十幾人圍住海上面舊白色野指指點點……咁我就行近小小用相機影下，又八卦下 d 人講乜……有幾個呀叔講：「X！九成係人啦！」「係啦，食剩個身，好 X 核突！」我先開始醒覺，可能真係出咗事……

我再影望一望個環境同果舊野，真係幾似人既身，但係又好似一堆泡咁，又諗可能個差佬俾人老點，影低佢地都好，咁就起勢係咁影佢地撈舊野上黎，仲諗埋點構圖，果陣個心仲想緊應該唔會咁巧合，九成九係誤報啦！過左一陣，真係撈左上黎，我就 zoom 埋去睇下，頂！真係好似人喎！

呢個時候我又聽到個差人 call 緊台，聽到咩叫人黎，發現屍體之類，我就真係醒醒地，而呢個時候，水警輪上既船員同係岸上既工人，用條竹撈左件舊上黎，仲一野隊落去，成件野散左仲有類似內臟連埋 d 一黑色細細粒既白色漿狀物流出黎，與此同時，一陣臭味攻鼻而來，聞到都想嘔，睇到呢度，我終於知道應該係堅野忍唔住講左一句︰「吊！乜係真架？」

亞Sir指揮緊……

真係好似……

可能個差人聽見我嘅驚嘆，終於意識到我原來唔係記者，只係一個路過亂影相的傻仔，就同我講︰「先生，好臭架，你快 d 行開啦」，我走都走唔切……仲有 d 想嘔……由於都幾核突，番到屋企都唔係咁想執 d 相 ( 開頭有幾張 under 晒 ) …… 不過我真係要寫出黎，發洩左佢先得，否則我驚我會發癲，同埋我希望我真係聽錯左…… 真係好噁心……

呢個世界，無圖無真相，但係，由於有張 zoom 到好埋，睇到好惡頂，所以唔 post 上來……